Bei enger Broschtkriibserkrankung wënsche sech vill Fraen, fir zur Rou ze kommen. Si sichen no enger alternativer Method fir hiert Ausgesinn no enger Mastektomie ze verbesseren. Si wëllen oft keng zousätzlech Operatiounen iwwert sech ergoe loossen a schnellst méiglech erëm op de Been sinn.
Si versichen hir Kraaft beieneen ze halen a sech, esou gutt et geet, op hir Kriibstherapie ze konzentréieren. Haut ginn et wäertvoll Informatiounsquellen zum Thema Broschtkriibs a Broschtopbaumethoden an et ass ganz wichteg als Patientin matzeschaffen.

Den ästhetesch, flaache Verschloss, op Englesch heescht en "Aesthetic Flat Closure", kuerz "AFC", a Frankräich froen d'Fraen no engem "Buste plat", zu Lëtzebuerg als vollwäerteg Alternativ zu den traditionelle Broschtopbau Methode bekannt ze maachen, ass eist Zil. 
Den AFC ka fir vill Fraen eng interessant Alternative sinn, fir no enger Mastektomie oder no enger Explantatioun ouni Broscht weider ze liewen.

Informatiounen aus dem Internet kënnen Iech en Iwwerbléck iwwer Krankheeten an eventuell Behandlunge ginn. Dës Informationen ersetzen a KENGEM FALL d'Berodung an d'Behandlung bei engem Dokter!

Et muss betount ginn, datt all néideg Therapien géint d'Kriibserkrankung musse gemaach ginn, esou wéi den Therapieplang et virgesäit! Och no der Akuttherapie mussen di virgesinne Kontrolle an de Joren duerno beibehale ginn, fir datt eng eventuelle Rechute oder d'Weidergoe vum Broschtkriibs esou séier wéi méiglech entdeckt ginn!

Mir warnen Iech viru Leit, déi Iech Versprieche maachen eng Krankheet, wéi de Broschtkriibs, mat net medezinesche Mëttelen oder Praktiken ze heelen! Loost Iech NI vu sou irrationalen an immens geféierleche Virgeensweise beaflossen! 

Och e schéinen, flaache Verschloss schützt Iech NET virun enger eventueller Rechute a versëchert, aktuelle Recherchen no, keng besser Iwwerliewenschancen! Et musse weider Daten opgeholl ginn fir méi präzis Statistike weltwäit ze kréien.

Wann dir Iech aleng (geloosst) fillt, kontaktéiert esou séier wéi méiglech d'Fondation Cancer Lëtzebuerg. Si steet Iech bei Ärer Erkrankung zur Säit. Dir sidd net aleng!

Männer déi u Broschtkriibs erkranken, sinn häerzlech wëllkomm op eisem Site. Och fir si ass et wichteg no enger Broschtkriibsoperatioun eng schéi Cicatrice ze kréien! All Fuederungen no engem optimale Mastektomie Resultat gëllen ouni Aschränkung och fir Hären!

GANZ WICHTEG INFORMATIOUNEN
- Wann eng Fra e schéinen, flaache Verschloss no hirer Mastektomie krut, ass et zimlech schwéier spéider e Broschtopbau ze maachen, well guer keng iwwerflësseg Haut a Fett méi do sinn. 

- Wann eng Fra oder e Mann kee schéinen, ästhetesche Verschloss no der Mastektomie kritt huet, kann eng Fra oder e Mann dat ëmmer nach méi spéit (och no e puer Joer) duerch eng Revisiounsoperatioun maache loossen.

- Wann eng Fra kee schéinen, ästhetesche Verschloss bei hirer Mastektomie krutt oder wollt, huet si natierlech och d'Méiglechkeet e spéidere Broschtopbau ze maachen (och no e puer Joer). Natierlech wa si keng medezinesch Kontraindikatiounen huet (Fëmmen = bekannte Risiko, Verschidden Antihormontherapien = bekannte Risiko, Allergien, Autoimmunerkrankungen (och déi, di d'Patientin bis zu deem Zäitpunkt vun der Rekonstruktioun nach net kennt), an Intolleranzen. 

Seriös plastesch, onkoplastesch a spezialiséiert Chirurgen soen Iech éierlech wat an Ärem Fall méiglech ass. Laaft net engem Wonsch Resultat no, wat net ëmzesetzen ass. Egal fir wat fir eng Optioun Dir Iech entscheed, informéiert Iech ganz gutt virun enger Operatioun! Är eege Broscht kritt Dir net zeréck an e Broschtopbau ass niewend der Kriibstherapie e separaten, ganz grousse Chantier, dee sech iwwer Jore kann hinzéien. E Broschtopbau ka ganz gutt reusséieren, all Fall ass individuell, all Fra ass eenzegaarteg. 

Iwwerpréiwten Informatiounen zum Thema Broschtopbau fannd dir hei:

Fondation Cancer Luxembourg
Mamma Mia! Das Brustkrebsmagazin Deutschland
Deutsche Krebsgesellschaft Deutschland
Apotheken Umschau Deutschland
Deutsche Krebshilfe Deutschland
Krebsinformationsdienst Deutschland
Haute Autorité de Santé France
Institut National du Cancer France
Rose Up Magazine France

Huelt keng iwwerstierzten Decisiounen! Informéiert Iech iwwer ALL Methoden, déi Iech ugebuede kënne ginn. Wann Dir onsecher sidd, frot onbedengt eng zweet Meenung! 
Nëmmen esou kënnt Dir, déi fir Iech, richteg Entscheedung huelen an zefridde weider liewen. Vergiesst nimools, datt Dir als Mënsch wichteg sidd an net e Bild wat d'Gesellschaft vun Iech, repektiv vum Fraekierper huet.
Vill Informatiounen, déi Iech op Ärem Wee kënnen hëllefen, fannd Dir op:
www.monbusteplat.fr

Dës Internetsäit, mat all hiren Informatiounen, ass mat der Hëllef vun den amerikaneschen, däitschen, kanadeschen, franséischen an nidderlännesche Fraen entstanen. Säit 2019 leeschten si eng grouss a wichteg Viraarbecht fir den AFC als vollwäerteg Broschtopbau Method anzeféieren. 
E grousse Merci u si all! Den Thema vum AFC ass an der Entwécklung, mir versichen Iech zäitno ze informéieren.

Ganz vill Informatiounen iwwer de Broschtkriibs a Sujete fir d'Liewensqualitéit bei Broschtkriibs oprecht ze halen ginn et och op FACEBOOK an INSTAGRAM. Och hei gëllt natierlech, datt Dir net op onrealistesch Offeren agoe sollt! Versicht bei bekannte Siten, wéi Mamma Mia! Das Brustkrebsmagazin asw. ze bleiwen fir Iech ze informéieren. Facebook an Instagram si ganz praktesch fir séier interessant an aktuel Informatiounen bei d'Patientinnen ze bréngen. 
Mëttlerweil ginn et ganz vill PODCASTEN a WEBINAREN iwwert den Thema vun der Broschtrekonstruktioun, respektiv vun der Net Rekonstruktioun mat enger schéiner Cicatrice.